He huna Chief Minister thusawi hrang hrangte:

“Pathian leh mipuite zarah sawrkar fawng kan han vuan ve a, kan tih ngai loh kan zawh ngai loh kawng, inzir zel chungin kan han zawh a, kan insit hle. Mithiam zawkte ngaihdan hriat leh an thurawn kan mamawh a, chuvangin vawiinah pawh nilengin ka tel ve phah a ni. Hetiang hun tha an buatsaih avang hian ZRF chungah pawh lawmthu ka sawi a ni.”

“Mizoram hian 5th India Five Year Plan atangin bul kan tan ve chauh va, kum 20 vel zet state dangte hian kan hmaah hmasawnna hnathawh an lo kalpui tawh bik a, chutihlai chuan keinin rambuai kum 20 kan tuar a nih kha. Vawiina kan dinhmunah inpuhtawn chang awm thin mahse kan bul tan a tlai bik kha a bulpui chu a ni. Bul hi kan tan tlai  bik viau naa kan thlen chin hi a sang ve tawh em em zawk.”

“Leiba kan ngah a, kumtinin kawng hrang hranga senso mamawh a sang tial tial bawk a. Chuvang chuan sum leh pai kan hmuh chhun chhun te fel fai leh daihzai taka hman kan tum a, kan bei nasa hle. Kan sawrkar hlim te khan ni 9 kan overdraft  a, kan chhawm a ni. Mahse overdraft leh hi kan tum tawh lo. Tun hnaiah Special Drawing Facility in sum kan puk zauh zauh va, sawi zui a hlawh hle a. Hei hi awmze nei, kan hlawkpui zawk vanga kan tih a ni.”

Sum puk chungchangah, “A bik takin Power Bill payment rebate hmu thei tura hun reilote atana han hman hawhna a ni thin," a ti.

Inrenchemna hi nasa takin a kalpui thu leh inrenchemna lama hma an lak tawh chin te, hmachhawp an neih te, Central sawrkara Security Related Expenditure Mizoram tana an dil dan te, mipui sawrkar an din theih nana Project Monitoring Committee an kalpui dan te, Non-Performing Assets lama hmalakna te leh K-deposit a kum thum aia rei sum dah tawh an thlithlai thu te, SASCI sum chu capital assets siam nan ngeia an hman tur thu te, thlai thar lei tura an intiam te chu an lei ngei tur thu te, hand holding hnuaiah sawrkar chu guarantor-a an tan tur thute leh sawrkar hmalakna pawimawh dang te a tarlang. 

Chief Minister hian, “Advisers, OSD leh Consultant, sawrkar sum sen belh mang lova kan ruat chu sawrkarin a hlawkpui,” a ti.

Chief Minister Office thunei leh chak taka an buatsaih mek thu leh CM office atanga Mizorama project awm zawng zawng uluk taka vil tlat an tum dan te pawh a tarlang niin Sorkar thuchhuah chuan a tarlang.